Etxebizitza Sailak babestutako etxebizitza-parkea handitzeko ahaleginari eutsiko diola agindu du. Horrela, Eusko Legebiltzarrak, apirilean izandako etxebizitzari buruzko osoko bilkura monografikoan, kontrako botorik gabe, onartu zituen hainbat ebazpenetan agindutakoa beteko du; izan ere, ebazpen horien bidez, Jaurlaritzari eskatu zitzaion, alokairuko etxebizitza gehiago izateko, inbertsio- edo pentsio-funtsekin negoziatzeko eta lankidetza publiko-pribaturako formulak bilatzeko.
Alokabide eta Visesa saneatu
Ekimen publiko eta pribatuko eragiketa horrekin, Eusko Jaurlaritzak, Etxebizitzaren aldeko Itun Sozialean eta 2010-2013 Etxebizitzaren eta Hiri Berrikuntzaren Plan Zuzentzailean hartutako konpromisoen haritik, salmentako diru-sarrerak esku publikoetara pasatzea lortuko da, baita etxebizitza horiek alokairuan egoteko epea handiagotzea ere, gutxienez beste 20 urtez egongo baitira alokairu-merkatuan.
Era berean, Alokabide eta Visesaren kontuak saneatuko dira eta bere eginkizunarekin jarraitu ahal izango dute. Alokabideren kasuan, alokairu publikorako etxebizitzak kudeatzen jarraituko du. Gainera, 4.000 etxebizitzak merkatu babestuan jarraituko dute "betirako", agindu du Sailak.
Eusko Jaurlaritzak "tamalgarri" gisa jo du Eusko Legebiltzarreko alderdiek ez babestu izana "etxebizitzen parkea handitzeko beharrizanari erantzuteko formula berrien" bilaketa.