Ze komentatu dizuete Basque Culinary Center proiektua eta eraikina ezagutzeko aukera izan dutenek?
Jendeari eraikina gustatu zaio. Inaugurazio ekitaldiak ondo joan dira, gustura geratu da jendea, eta geu ere bai. Basque Culinary Centerren egoitza ikusi duenak ustekabe atsegina hartu du. Espazio zabalak ditu, argi asko. Eta, goi mailako ekipamenduak. Zorionak eman digu jendeak. Nortasun handiko eraikin berezia da. Jendea hartzeko eta batzeko diseinatua.
Lau urte dira proiektuarekin lanean hasi zinetela. Zeini bururatu zitzaion ideia?
Euskal Herriko sukaldari handi eta ospetsuek, batik bat, jakin izan dute sugarrari eusten, berau zaintzen. Bizirik mantendu dute. Intuitiboki, behin eta berriro aldarrikatzen zuten goi mailako sukaldaritza unibertsitate bat. Mondragon Unibertsitateari aurkeztu zioten ideia duela lau urte. Ideia bat zen. Iruditu zitzaigun interesgarria zela eta sektore honetan aukera zegoela unibertsitate bat sortzeko.
Patronatu bat sortu duzue BCC aurrera ateratzeko. Zeinek osatzen dute Patronatu hori?
Fundazioan daude lau eragile mota: batetik, MU, hezkuntza zentro bezala; bestetik, Azti-Tecnalia, ikerketa zentro bezala; beste kolektibo bat dira sukaldariak, zazpi euskal sukaldari ospetsu; erakunde publikoak ere badaude: Donostiako Udala, Gipuzkoako Foru Aldundia, Eusko Jaurlaritza eta Madrileko Zientzia eta Berrikuntza Ministerioa. Eta badaude enpresak ere, elikadura alorrekoak: Fagor, Eroski, Martiko, Heineken eta Andaluziako Covap izeneko kooperatiba. Familia handi bat osatu dugu ekimen publiko eta pribatua uztartuz.
Ze paper hartzen du honetan guztian Mondragon Unibertsitateak?
MUk posible egin du proiektua. Unibertsitate proiektua da. Diseinu akademikoa egin dugu, bertan txertatuz sukaldaritza. MUko fakultate bat da, laugarrena; graduak, masterrak eskaintzen ditu…. BCCren jarduera guztiaren titularitatea fundazioarena da, baina unibertsitate eskaintza MUrena da. Proiektuari estaldura akademikoa eman dio gure unibertsitateak.
MUrendako, zer da BCC?
Laugarren fakultatea da. Ez hori bakarrik. Sektore berri bat ere bada. Orain arte aritu izan gara injinerutzan, irakaskuntzan, enpresen kudeaketan… Orain, elikaduraren eta gastronomiaren sektorean sartzen gara. Eta aukera berriak irekitzen zaizkigu.
Berrikuntza eta ikerketa da MUren eta, oro har, Mondragon Korporazioaren ikurretako bat. Fakultate berri honek eutsi egingo dio ideia horri?
Bai. Uste dut etorkizunean pentsatzen duen edozein erakundek berrikuntzaz pentsatu behar duela eta berrikuntza aplikatu behar duela. Gure kasuan, hala da. Korporazioko kooperatibak ere berrikuntzan aitzindariak dira eta BCC horren isla da. Sorreratik da berria.
Zela finantzatzen da BCC?
Erakunde publikoen konpromisoa izan da azpiegitura bere gain hartzea, eraikina finantzatzea. 17 milioi euroko aurrekontua izan du. Hortik aurrera, urteroko jarduna geure kudeaketa lana izango da. Ez dugu dirulaguntza estrukturalik. Matrikulen, masterren, ikastaroen eta bestelako jarduera akademikoen bitartez autofinantzatzea da asmoa. Eraikinak aukera handiak eskaintzen dizkigu, gainera, bestelako jarduera batzuk antolatzeko: aurkezpenak, jardunaldiak, ekitaldiak…
Diozue mundu mailan erreferentzia izango dela Basque Culinary Center. Zergatik?
Gauza asko ditu berritzaileak. Lehenbizi: eragile asko daude inplikatuta. Hori oso zaila eta ez ohikoa fakultate batean. Lortu dugu konplikatzea mundu mailan erreferente diren sektoreko protagonistak, sukaldariak; erakunde publikoak. Baita enpresa pribatuak ere. Bestalde, Nazioarteko Aholku Batzordea ere badugu, munduko sukaldari onenek osatzen dutena eta Ferran Adria buru duena… Denok batera goaz eta hori berria da. Erantzukizun handia eskatzen digu horrek. Bestalde, gastronomia eta sukaldaritza alorrean berria da era honetako fakultatea. Mundu akademikoan diziplina berri bat sortu dugu. Gainera, ikerketa zentro bat daukagu estalpe berean eta hori ere berria da.
Baina ze eskainiko du fakultate berri honek munduan dauden antzeko beste fakultate batzuek eskaintzen ez dutena?
Ameriketako Estatu Batuetan badaude antzeko eskolak, oso onak. Baina guk ikerketa zatia ere badaukagu. Eta Italian badago beste bat, baina ekoizlearekin lotutako gastronomia da eta ez, horrenbeste, sukaldaritzarekin lotuak. Ñabarduretan dago ezberdintasuna, baina horiek oso garrantzitsuak dira.
Zein izango da mundu mailako Aholku Batzordearen ekarpena?
Helburua da guri estrategia aholkuak ematea. Mundu mailako sukaldariek egin berri dute Perun hausnarketa, etorkizuneko sukaldaritzaren gainean. Hausnarketa hori guretzako ezinbestekoa da. Bestalde, neurri batean, gure enbaxadore ere badira. Bestalde, Patronatuan dauden euskal sukaldariek zuzen zuzenean hartuko dute parte; egunerokoan, eta baita klase magistralak ematen eta abar. Lanbidearekiko duten pasioa ikasleei transmititzea da helburua.
Noiz hasiko da ikasturtea?
Gradua datorren astelehenean hasiko da. 56 ikasle hasiko dira eta beste 14 gehituko zaizkie urtarrilean, beste sukaldaritza eskola batzuetatik datozenak. Lehen promozioan 70 izango dira, guztira. Horiek aukeratzeko, mundu osotik 360 eskaintza jaso ditugu. Proiektuak interesa sortu duen seinale.
Ze behar da bertako ikasle izateko?
Baldintza akademikoak ez dira bereziak. Selektibitatea nahikoa da unibertsitate batean sartzeko. Baina, bestalde, eskatuko diegu, batik bat, ilusioa. Ez da edozein titulazio. Motibazio handiarekin datoz lehen ikasleak.
Nondik datoz ikasleak?
Heren bat dira euskaldunak; beste zati handi bat Espainiako eskualde ezberdinetakoak; eta, gero, atzerrikoak ere bai.
Ze ikasiko dute?
Sukalde teknikak; zerbitzatzen; jatetxeak kudeatzen… Baina baita zientzia ere. Sukaldean eta elikaduran zientzia prozesuak daude eta horiek jakin behar dituzte ulertzen eta interpretatzen, gero, berrikuntza etorriko delako. Bestalde, gastronomia, edozein tokitako kulturaren zati da eta hori ere ikasiko dute. Eta, jakina, kudeaketa. Formazio zabal, sakon eta integrala. Diziplina anizdun formazio honekin aukera izango dute hainbat alorretan jarduteko.
Ze irtenbide izango dute?
Sukaldari buru izan ahal izango dira; zerbitzatzen dutenen buru; jatetxeetako gerente… Lan egin ahal izango dute ikerketa zentroetan elikadura alorrean, elikadura industrian, komunikazioan, katerin enpresetan…
Zenbat irakasle izango dira?
Lehen seihilabetean dozena erdi bat. Sukaldariak, historia irakasleak, informatikariak, produktuen gaineko elikadurako adituak…
Zuk zeuk ikasi duzu lau urteotan?
Izugarri. Gastronomiaren zalea naiz, asko gustatzen zait, baina alor akademikoa garatzea erronka handia izan da eta sektoreko jende askorekin lan egiteko aukera izan dut.