Arantzazuko erakunde guztiek Santutegian egingo diren ekintzen udazkeneko gida kaleratu dute. Udazkenean egingo diren ekintza kulturalak batzen ditu, ikastaroak eta mendi irteerak, batik bat. Hala nola, mikologia, espeleoabentura, esnekiak nola egin, artzain-txakurrak trebatzea, artzainen produktuekin postreak nola egin… Urri, azaro eta abendu bitartean egingo dira ekintzok eta interesa duten guztiek har dezakete parte.
Urtarrilean abiarazi zuten
Urtarrilean Arantzazun lan egiten duten erakunde guztiek elkarrekin prentsaurrekoa egin zuten ekimen berri bat ezagutzera emateko asmoz. Ekimenak bi helburu zituen: lehena, denon artean euren jarduera guztien programazioa bateratzea hiruhileko esku-orrietan eskaintzeko; bigarrena, urtaro bakoitzaren begiradari eta ñabardura desberdinei erreparatuz jendeari Arantzazu ezagutu eta bisitatu dezan gonbita egitea. Hain justu ere, udazkenean arratsaz eta kulturaz gozatzea proposatzen dute. Hortaz, agente bakoitzaren jarduerak eta ekintzak egitura bakar horren arabera ordenatu dituzte. Egitaraua ikusgai dago www.arantzazu.org webgunean.