Aurreko agintaldian foru gobernuan zeudenen argumentua zen, N-1 errepidea Europa zeharkatzen duen bide nagusietakoa izanik, Gipuzkoako errepideen mantenu egokirako, ezinbestekoa zela bidesaria ezartzea. Bidesaria, kamoi astunendako. Oraingo foru gobernua, PP eta Aralar ez dira iritzi berekoak, eta une honetan gehiengoa dutenez Batzar Nagusietan, atzera bota zuten atzo foru arau hori.
Zubietako errauskailuaren alde
Bestalde, aurreko agintalditik indarrean dagoen zaborren kudeaketaren gaineko planari eta, ondorioz, Zubietan errauskailua eraikitzeari, bultzada eman zien Batzar Nagusiek. EAJk eta PSE-EEk aurkeztu zuten horren gaineko proposamena Batzar Nagusietan eta haien botoiei PPkoak batu ziren; honenbestez, aurrera atera zen proposamena.
Bilduk errauskailuaren aurkako iritzia du. Eta hura eraikitzea atzeratzea da Gipuzkoako foru gobernuaren postura. Gaiaren gainean eztabaidatu eta azken erabaki bat hartzeko moratoria planteatzen du. Bilduk, oraingoz, halere, ez du aurkeztu Gipuzkoan zaborren kudeaketarako alternatibarik. Edozelan ere, Gipuzkoako herri batzuetan, horien artean Antzuola, ezarri den atez ateko sistemak emaitza onak lortzen diharduela adierazi zuen Bilduko ordezkariak atzo Batzar Nagusietan.
AHT, "ezinbestekoa"
Horretaz gain, Abiadura Handiko Trenaren aldeko proposamen bat ere onartu zuten Batzar Nagusiek EAJ, PSE-EE eta PPren aldeko botoekin. Alderdi hauen iritziz, Abiadura Handiko Trena "ezinbestekoa" da Gipuzkoarendako.