Gehiegizko saria eraman du Neka Galanen taldeak gaur Ibarra futbol zelaitik, bergararrek apenas sortu dutelako arriskurik partidu osoan zehar. Berdinketaren aurretik izan dute beste gol aukera bakarra: Igorrek gol marran bertan urrundu du Ugarte erdilari mahoneroaren burukada.
Aurretik, UDA izan da nagusi. Oxel beteranoek egin du etxekoen gola, 49. minutuan, Lopezi baloia ondo gurutzatuta. Bere lehen partidua zen gaur berarendako Ibarran. Aurretik makina bat taldetan jardundakoa da Oxel, Mondra, Bergara, Lemoa, Ondarroako Aurrera, Gernika eta Beasain tartean. Areako txakur zaharra, gaur erakutsi duen bezala.
Ibaik izan DU 2-0ekoa egiteko aukerarik onena: atezainaren aurrean bakarrik gelditu, baina Lopezek aurrelariaren ezkerkada urruntzea lortu DU. Piruk ere izan du beste aukera on bat eta jokaldi eztabaidagarri bat ere izan da, Eloyk bere atera urrundu eta atezainak marran bertan geratu duenean. Ez zirudien gola. Berdinketarekin UDAkoak etsita eta Bergarakoak, pozik etxera.
Aloñak etxean galdu
Ondarroako Aurrerak partidu ona egin du Azkoagainen eta merezita eskuratu du garaipena. Etxeko taldeak ezer gutxi egin ahal izan du bigarren zatian bizkaitarren erasoko jokaldien aurrean. Jaun eta jabe izan dira Ondarroakoak atsedenaldiaren ondoren. 0-1ekoa 48. minutuan iritsi da eta kontraerasoan beste bi gol egin dituzte. Partiduaren azken minutuetan etorri da Aloñakoen gol bakarra, Asier Ugarteren bidez. Oraindik goiz izan arren, Andoni Askargortaren taldeak orain arte jokatutako bi partiduak galdu ditu. Bisita zaila izango dute asteburuan, Pasaia liderraren etxean jokatuko baitute oñatiarrek.
Lehenbiziko partiduan Beran 1-0 galdu ondoren, Mondrak ligako lehen puntua lortu zuen zapatuan, Mojategin Trintxerperen aurka husna berdinduta. jende dezente batu zen, zale gaztetxo ugari tartean. Hala ere, berdinketarekin konformatu behar izan ziren etxekoak. Golik egin gabe jarraitzen du Igor Rodriguezen taldeak. Hondarribiari bisita egingo diote zapatuan.