Espainiako Itzulia duela 33 urte pasa zen Euskal Herritik azkenekoz. 1978ko maiatzaren 14a zen, eta Anoetako belodromoan amaitu zen etapa hura; hala ere, epaileek bertan behera utzi zituzten etapa hartako emaitzak, txirrindulariek salatu zutelako bidean oztopoak baino ez zituztela aurkitu: errepidea moztuta, hainbat lekutan. 33 urte geroago Debagoienetik igaroko da proba, eta proba Elgetatik sartuko da Debagoienera. Batzuendako aldarrikapenerako eguna izango da, beste batzuendako ziklismo onenaz etxean gozatzeko aukera.
Vueltak ibarreko zirkulazioan eragin zuzena izango du, noski: itzulia ailegatu baino 20 bat minutu lehenago txirrindulariak igaroko diren errepideak erabat moztuko dituzte: Elgetan, Gudarien bidea; eta Bergaran, San Lorentzo, Zubieta, Masterreka eta Aranerreka. Eta Gorlako bidean jende asko batzen bada, are lehenago moztuko dute alde bietatik, Bolutik eta Azkoititik, Bergarako Udaltzaingoan esan digutenez.
Antzuolatik pasatu aurretik ere itxi egingo dute errepidea, eta baita handik Kanpanzarrera bidea ere. Hala, Bidegitik jakinarazi dute AP1 autobidean ere eragina izango duela lasterketak, Bergara Hegoa eta Arrasateko irteerak itxi egingo dituztelako.
Mobilizazioetarako deia
Egun horretarako Espainiako Itzuliaren kontrako mobilizazioak deitu dituzte: Arrasateko Ezker Abertzaleak Kanpazarren ‘Txirrindularitza BAI, Inposaketari EZ. Euskal Herria NAZIOA’ aldarrikatzera animatu nahi ditu arrasatear guztiak; horretarako, Arbolapetan hirurak laurden gutxiagotan edo Kanpazarren hiruetan elkartzeko proposamena luzatu du. Eta Bergaran, herritar talde batek, Bilduk eta Aralarrek deituta kontzentrazioak egingo dituzte Gorlan eta Burdinaten. Ikurrinak balkoietara ateratzeko deia ere egin dute; gaur eta bihar salgai jarriko dituzte Irala kalean.