Karenka izango da Xarmaren bigarren lanaren izena. 12 abestiz osatutako diskoa izango da, guztiak euskaraz. "Diskoko abesti ia guztiak guk sortutakoak dira; abesti bat izan ezik; hori Ondarroako RKS taldearen bertsioa izango da". Karenka-k aurrez aurre esan gura duela azaldu dute Xarmako kideek.
Disko gogorragoa
"Abesti landu, indartsu eta zuzeneko tinkoa" dutela aipatu zuen Danbakako epaimahaiak Xarmari lehenengo saria emateko orduan. Itsaso Gutierrez taldeko kideak dio bigarren disko hori are eta gogorragoa izango dela, eta hori bilatzera joan direla: "Soinu indartsuagoa egin nahi izan dugu; guk nabaritu dugu aldea eta uste dugu entzuleek ere nabarituko dutela", azaldu du. Amarauna lehenengo diskoa atera zutenetik Xarmak eboluzioa izan duela gaineratu dute bai Gutierrezek eta baita Jon Kirru Iparragirrek ere.
Rocka da Xarma taldearen ardatza, eta doinu horietan bere ibilbidea egiten jakin du Xarmak.
Gustura egindakoarekin
Azken asteotan egin duten lanarekin oso gustura geratu dira Xarmakoak: "Gustura egon gara Shot estudioan Iñakirekin eta lan ona egin dugula uste dut", azaldu du Gutierrezek.
Diskoa Durangoko Azokarako kalean izatea espero dute. Diskoan, gainera, Intxorta 1937 kultura elkartearendako eta Ikasle Abertzaleendako egindako abestiak ere sartu dituzte.
Danbakak izan duen eragina
Danbaka irabazteak eraginik izan duen galdetuta, Gutierrezek eta Iparragirrek aipatu dute eragina izan duela; baina, uda honetan, esaterako, disko berriko abestiak prestatzen buru-belarri lanean ibili direla eta kontzertuak eskaintzeko denborarik ez dutela izan azaldu dute.
Bestalde, gaineratu dute diskoa grabatzeko aukera izatea zoragarria dela; izan ere, finantziazioa bilatzea izaten da zailena. "Dirua behar da diskoa grabatzeko", dio Gutierrezek.
Bateria-jole berria izango dute
Taldeari dagokionez, aldaketak izango dituzte aurrera begira. Orain arte bateria-jole izan den Josuah Froufek taldea utzi du eta haren ordez Denis Alberdi berriztarra sartuko da taldean. Keike taldean ibilitakoa da Alberdi, Gutierrez eta Iparragirrerekin batera.