Eta, aste barruko lan hori fintzeko balio dute lagunarteko partiduek. Hala, zapatu arratsaldean hiru hitzordu ezberdin izango ditugu ibarrean, Oñatin 17:00etan, Arrasaten 16:30ean eta Aretxabaletan 19:00etan.
Arrasate Hiria torneoa
Joan den astean mahoneroek irabazi zuten Bergara Hiria txapelketa, eta bihar jokatuko dute arrasatearren torneoa. 16:30ean hasita aurrez aurre izango dira Mondra, Bergara eta Aretxabaletako bigarren taldea. Eta bigarren taldea diogu, UDAko lehenengo taldeak Ibarran jokatuko duelako lagunartekoa, bihar, Amurrioren kontra (19:00). Arrasate aldean ez dute oso ondo hartu Aretxabaleta bigarren taldearekin joatea –ulergarria da– baina erabaki horren atzean ez da fede txarrik egon, UDAko entrenatzaile Juanan Cruz-ek adierazi moduan: "Duela hilabete eta erdi hasi ginen denboraldi-aurreko planifikazioa egiten, eta orduan adostu genuen Amurriorekin oraingo asteburuan lagunartekoa jokatzea. Eta, Arrasatekoen gonbidapena ondoren jaso dugu".
Horrenbestez, 16:30ean jokatuko dute Mondrak eta Bergarak, 17:30ean Bergarak eta Aretxabaletak, eta 18:30ean Aretxabaletak eta Mondrak.
Jose Luis Agirreren oroimenezkoa
Oñatikoek ere hitzordu propioa izango dute, Jose Luis Agirreren lehen oroimenezkoa egingo dutelako bihar, 17:00etan, Azkoagainen. Aloñak Gasteizko Aurrera taldearen kontra jokatuko du eta partidua erabiliko dute Aloñaren aurkezpen ofiziala egiteko. Hala, Asteleheneko Goiena-n talde guztietako jokalariak aurkeztuko dizkizuegu.