Luis Dalda Madrilen jaioa da eta Monserrat Torrentekin ikasi zuen organoa. Madrilgo Goi Mailako Kontserbatorioan Organo Irakasle Gorenaren titulua eskuratu zuen karrera amaierako sari bereziarekin. Ondoren, hobekuntza eta espezializazio ikastaroak egin zituen, besteak beste, Guy Bovet, Hubert Meister eta Michael Radulescurekin. Han eta hemen eman ditu kontzertuak eta RNEko Radio Clasica irrati katean Órganos historicos irratsaioaren arduraduna da. Era berean, Salamancako Musikako Goi Mailako Kontserbatorioko zuzendaria eta organoko katedraduna da gaur egun. Esan bezala, egubakoitzean, hilaren 12an, Aramaioko San Martin elizan izango da. Emanaldia 19:00etan hasiko da.
Xabier Lete gogoan Arantzazun: sarrerak salgai bihar
Bestalde, Xabier Leteren oroimenez emanaldia izango da bihar, eguena, Arantzazun. Kontzertuak ikusmin handia piztu du eta hori dela eta, bihar bertan sarrerak erosteko aukera izango da Arantzazun bertan, 17:15etik aurrera. Sarrerak agortuta zeuden eta beste 300 jarriko dituzte salgai ostegunean Arantzazun. 15 eta 5 eurotan eskuratu ahal izango dira sarrerak. 5 euroko sarrerak ez dira leku oso onekoak, eszenatokia apenas ikusten dela aurreratu baitute antolatzaileek.