Ogasun eta Finantza Departamentuaren webguneak "itxura freskoagoa eta erakargarriagoa" izango du, baina, "nagusiki, erabiltzaileari tresna egokia" eskaini nahi dio Foru Aldundiak. Hortik aldaketa.
"Gero eta gehiago dira Ogasun eta Finantza Departamentuarekin harremana sarea erabiliz egiten duten herritarrak, eta horientzako tresna hobetzeko ahalegina izan da aldaketa hau", esaten dute.
Albiste interesgarriak, lehenengo
Aldaketa handiena uztailaren 27an izango den arren, gauza batzuk berritu dituzte dagoeneko:
lehen orrialdeak itxura aldatua du, eta baita egitura bera ere; orain, ekonomia albiste interesgarriak daude lehendabizi. "Horrela izango da aurrerantzean ere, eta webgune osoak ere itxura hori bera hartuko du; aurrerapen modura, beraz, hasierako orrialdean egindako aldaketa duzue", esaten dute foru arduradunek.
"Aldaketa aipatutako helburuekin egin bada ere, Gipuzkoako Foru Aldunditik argi utzi nahi dugu webguneak lehen adina informazio eta sarbide izango dituela aurrerantzean ere", gaineratzen dute.