Erakunde publikoek beste pauso bat eman dute poltsikoko telefoniaren sektorea erregulatzeko: joan den astean jakinarazi zuen Espainiako Telekomunikazioen Merkatu Batzordeak 2012ko ekainetik aurrera telefono operadorez aldatzea lanegun baten buruan egin beharko dela; hau da, telefono operadore batetik bestera aldatu ahal izango da norbera, zenbakiari eutsiz. Orain, hainbat egun hartzen ditu tramite horrek.
Biharko Goiena aldizkarian, poltsikoko telefoniaren gaineko erreportajea agertuko da: tarifak, portabilitatea, telefonoari probetxua ateratzeko trikimailuak…
Negoziatzeko eta norbere operadorearen aldetik baldintza hobeak lortzeko aukera asko murriztuko denez, batzuek diote arau berriarekin galtzen irteten dela kontsumitzailea. Movistar eta Vodafone ere epe berriaren aurka agertu dira.
Baina, oro har, albiste ontzat hartu da erabiltzaileen aldetik, ustez enpresek euren zerbitzu eskaintza eta bezeroari arreta hobetu egin beharko dutela urte osorako, bezeroak galdu ditzaketelako. Iaz, Hego Euskal Herrian eta Espainian, 4,8 milioi operadore aldaketa izan ziren.
