Nazioarteko proiektu berria martxan jartzeko zazpi milioi euro inbertitu du Cikautxok. Txinan planta berria irekita, Automozioaren eta Etxetresna Elektrikoen merkatuen globalizazioaren eskakizunei erantzun nahi die, sektore horietara bideratzen baitu bere produkziorik gehiena. Horrenbestez, "Cikautxok finkatu egingo du nazioartean duen presentzia, hainbat merkatutan dituen produkzio lantegien bidez, horien artean Txekiar Errepublika, Eslovakia, Brasil eta orain Txina", diote Mondragon Korporazioko arduradunek.
Cikautxo Txinak hasieran 6 injekzio makina izango ditu, Txinako merkatuko bezeroentzat kautxuzko piezak egiteko. Aurreikusita dago urtea amaitu baino lehen langile taldean 45 pertsona aritzea eta fakturazioa 1,2 milioi euro izatea.
%7 gehiago saltzea espero dute
Cikautxok 153 milioi euroko fakturazio osoa lortu zuen 2010ean, eta nazioarteko salmenten zifra 134 milioi eurora
iritsi zen (%87,5). Aurtengo ekitaldiari dagokionez, aurreikusita dago salmentak %7 handitzea aurreko ekitaldian lortutako zifrarekiko.