Hainbat urtetako geldialdiaren ondoren, Jose Luis Lizartzaburu mutrikuarrak eta haren lan taldeak etapa berriari ekin zion joan den azaroan baina aurreikuspenak ez dira bete eta itxita dago Batzokia. Goitik behera berritu zuten taberna eta jatetxea eta hara joandako bezeroak oso gustura ziren arren, uste baino erantzun eskasagoa jaso du eta itxi beharrean aurkitu dira.
Bai Batzokia enpresari utzi zion Bergarako EAJk herriko batzokiko taberna eta jatetxea kudeatzeko ardura. Bai Batzokia enpresan batzen dira Bizkaia eta Gipuzkoako hainbat batzoki, frankizia moduan; besteak beste, Zarautz, Beasain, Azkoitia, Eibar edo Durangokoa hain zuzen.
Bergarako batzokiko azken arduradunak ostalaritzan eskarmentu handikoak dira. Izan ere, Jose Luis Lizartzaburu Mutrikuko plazan dagoen Ametza tabernakoa da eta han dihardu lanean. Bergarako batzokiaren azken etapa honetan bi jangela egokitu zituzten, 20-25 bat lagunendako eta bestea 70 bat lagunendako. San Pedro kalean egindako trafiko aldaketek eta Komenio kaleko Pol-Pol tabernaren itxierak ez zion mesederik egingo Batzokiari. Gaur egun lehen baino jende gutxiago ibiltzen da inguru horretan. Ikusteko zer gertatuko den lokalarekin; oraingoz kartel bat jarri dute atean, "Itxita berriz jakinarazi arte" diona.