Inoizko parte hartzerik handiena izan da: 21.009 bazkidek eman dute botoa, bazkide guztien %62,05ek. Ibaiganen jarri dituzte hautestontziak eta bertatik igaro dira klub zuri-gorriaren 20.000 bazkidetik gora, horien artean, bazkide ospetsu ugari: futbolari ohi, entrenatzaile, agintari…, baita Lopez lehendakaria edo Bilbao ahaldun nagusia ere.
Urrutiak irabazita, Marcelo Bielsa argentinarra izango da zuri-gorrien hurrengo entrenatzailea. Realekoa izateko negoziaziotan aritu zen, txuri-urdinak Montanierren alde egin aurretik, eta Realeko lehen taldeko eta harrobiko jokalarien bideo ugari ikuskatu zituen. Bielsak, hortaz, ia Montanierrek baino hobeto ezagutzen ditu Realeko jokalariak.