Garitanok nabarmendu du begi-bistan dela gobernu berria "parekidea, euskalduna, irekia, gardena eta gipuzkoarron parte-hartzea bermatuko duena" izango dela.
Diputatu berrien profilak ere azpimarratzekoak direla esan du Garitanok. Gobernu gaztea dela esan du, 30 eta 48 urte artekoa, baina teknikoki "aski prestatuta eta esperientzia handikoa".
Gaineratu du, gipuzkoarrek agindutako egitasmoa "ondo baino hobeto" aterako dutela aurrera.
Kritikak PSE-EEtik
Rafaela Romero Batzar Nagusietako PSE-EEko bozeramaileak eskatu dio ahaldun nagusiari, Gipuzkoako jendartearen "pluraltasuna" aintzat hartuta goberna dezala. Bestalde, gobernu berria "ahula" dela esan du eta gogoratu du 22 batzarkideren babesa izan arren, "gutxiengoan" gobernatuko duela.
Era berean, gobernua azkar osatu bai, baina "benetan garrantzitsua dena gobernu programa" dela esan du. "Gipuzkoar jendartea demokratikoki birsortzeko politikak ezagutu gura ditugu; era berean, krisiari aurre egiteko zer egin behar duen; lanpostuak sortzeko zer egingo duen; zela konponduko duen errepideen finantzazioaren arazoa; udalen zorrari aurre egiteko zer proposamen egingo duen… Erantzunak gura ditugu, ez izenak" esan du.
Bihar Azpeitian
Zapatu eguerdian Azpeitian Gipuzkoako Batzar Nagusietako bilkura ibiltaria egingo da. Ekitaldi hori aprobetxatuz, Ikerne Badiolaren izendapena egingo du Garitanok.
Hauxe da aurreikusitakoa:
11:50: Azpeitiko agintariek ahaldun nagusiari, diputatuei, eta Batzar Nagusietako Mahaiko lehendakariari harrera egingo diete.
11:55: Azpeitiko udaletxe barruan Ikerne Badiolari "benera" jarriko dio Garitanok.
12:00: Batzar Nagusietako pleno irekia izango da. Batzar Nagusietako buruak eta Azpeitiko alkateak hartuko dute hitza. Martin Garitanok ez du adierazpenik egingo.