Zale asko batu ziren astelehenean Bergara Hiria torneoko finalean, baina tamalez, ez Mendizabalek (Antzuola), ez Rezustak (Bergara) ezin izan zuten txapela jantzi. Hala, senior mailan 2010eko azpitxapeldunak gailendu dira aurten, Larrañaga-Untoria.
Erraz irabazi zuten finala (22-10); Larrañagak zortzi tanto egin zituen sakez, eta atzean Untoriak sekulako nagusitasuna erakutsi zuen –Asegarcerekin egingo du aurki debuta–, ondo menderatu zuen Irureta. Hala, Mendizabalek ezer gutxi egin ahal izan zuen, bere bikotea goitik behera menderatu zuten-eta.
22 urtez azpikoetan Juaneneak eta Lasak 22-15 hartu zuten mendean Victor eta Rezusta. 9-9 egon ziren markagailuan, baita 14-14 ere, baina Juaneneak aurrean egindako tantoak (9) erabakigarriak izan ziren, baita pilotarik galdu ez izana ere. Victorrek ez zuen egunik onena izan, huts asko egin zituen, eta Rezusta urduri hasi bazen ere, partidu txukuna egin zuen. Hala, Juanenea aukeratu zuten torneoko pilotari onena.