Mendi lasterketa polita izan zen zapatukoa. Helmugan Arkaitz Zamakona otxandioarra eta Haritz Kortabarria arrasatearra nagusitu ziren. Lagunak dira, elkarrekin entrenatzen dute eta ia hasieratik jarri ziren lasterketaren buruan. Bide zati handiena elkarren ondoan egin ostean helmuga elkarri eskua emanda zeharkatzea erabaki zuten. Eta horrela egin zuten.
Antolatzaileen aurreikuspen baikorrenak gaindituz bi gazteek ordu eta erdi pasatxoan egin zituzten ibilbideko 20,10 kilometroak. Zamakonaren eta Kortabarriaren denbora 01:37:20 izan zen.
Emakumeak lau
Parte-hartzaileak pozik dira lasterketaren lehenengo edizioak izandako harrerarekin. 62 lagunek hartu zuten irteera, tartean lau emakume. Helmugara iristen azkarrena Nerea Amilibia izan zen. Euskal selekzioko lasterkari aiarrak bi ordu inguru nahikoa izan zituen lasterketa amaitzeko; bere denbora 02:02:24.
Rosa Lasagabaster eskoriatzarra (02:23:59) izan zen bigarrena eta Marije Zubizarreta (02:45:44) hirugarrena.
Antolakuntza ona
Erakargarria izateko motibo bat baino gehiago zituen Eskoriatzako Gabez Takarraran lasterketak; lehenengo edizioa, gabez, antolatzaileen ilusioa... Eskoriatzako Herriko plazatik lasterkarien irteera eta helmuga ikusteko aukera izan nuen. Gainera, eta antolatzaileen laguntzari esker, lasterkariak Lapako (4. kilometroa) zein Mandobideko (10. kilometroa) anoa-puntuetatik pasatzen ere ikusi nituen. 13 graduko tenperaturarekin giro ona izan zuten lasterka egiteko, eta nahiz eta argitasuna eskasa izan bidegurutze guztiak zeuden material egokiarekin markatuta. Toki askotan jendea ere bazegoen argibideak zein animoak emateko. Lasterketan 62 lagunek hartu bazuten parte; antolakuntzan 70 bat lagun inguru ziren.
Gogorrena, azken jaitsiera
Kontuan izanda lasterketak 1024 metroko desnibel positiboa zeukala lasterkariei sufritzea tokatu zitzaien apur bat. Helmugan jaitsierak igoerak baino gogorragoak izan zirela adierazi zuen batek baino gehiagok. Ibilbidearen erdi parean min egin zuen Eskoriatzatik Mandobiderainoko igoerak (530 m) eta Atxorrotzetik herrirainoko jaitsierak, azkena, zer esanik ez. Baina lasterkari gehienendako esperientzia positiboa izan da; "errepikatzeko modukoa" askoren esanetan.
Argazkiak hemen.