Zirkulazioaren arriskuak ekiditeko Eusko Jaurlaritzako Trafiko Zuzendaritzak bi ipuin argitaratu ditu. Ipuinok umeek lau eta sei urterekin egiten dituzten pediatria kontroletan banatuko dituzte aurrerantzean. Lau urteko txikiek Mikelatsen helburua: mugikortasun segurua delako ipuina jasoko dute eta sei urtekoek, berriz, Mikel eta Sara: lehenengo-lehenengoa, mugikortasun segurua.
Gurasoek irakurtzeko
Ipuinak irakurterrazak dira, baina umeen adina kontuan izanda helduei tokatuko zaie ipuinak kontatzea. Hala, helburu bikoitza lortzen dute bultzatzaileek; haurrak zein helduak sentsibilizatzea. Kasu bietan testuak Xabier Olasorenak dira eta ilustrazioak Agurtzane Villaterenak. Pedagogo talde baten babesa izan dute.