Aske eta jaiotzen ikusi zuen herrian dago Jon Agirre preso ohia. Atzo bueltatu zen Aramaiora, 30 urte kartzelan egin ostean. Ongietorri ekitaldia kiroldegian egin zioten, eta 19:00etan hastekoa bazen ere, berandu hasi zen; muxuak, besarkadak eta denetariko maitasun keinuak izan ziren atzerapenaren errudunak. Ekitaldian bertan, kiroldegiko harmailak lepo bete ziren. Aramaioarrez gain, Arrasateko hainbat lagun izan ziren, Arrasaten lagun eta ezagun asko dituen seinale. Aramaioko eta Arrasateko jendeaz gain, Euskal Herri hainbat txokotako jendea ere bertaratu zen.
Ekitaldi hunkigarria
Ongietorri ekitaldia motza eta berezia izan zen. Txalaparta doinuekin eta txalo zaparrada amaigabe batekin sartu zen Agirre pilotalekura. Ekitaldiak, motza izan arren, askorako eman zuen: aurresku berezia –30 herritarrek dantzatu zioten, espetxean egin dituen urte bakoitzeko dantzari bana–, lore eskaintza, 30 izarrez osatutako murala, bertsoak...
Ekitaldiaren amaieran, besarkada eta lagunen arteko solasaldien artean, honakoa adierazi zigun Agirrek berak, umoretsu: "Gaur bakarrik muxu eta besarkada gehiago eman ditut bizitza osoan baino, eta dudan adinarekin hori ezin daiteke ona izan..."