Fagor Etxetresnek 1.396 milioi euro fakturatu zituen 2010ean, 2009an baino %1 gutxiago, eta bere Ebitda (esplotazioko emaitza brutua) %25 hazi zen, 75 milioi hartu arte.
Enpresak esan du urte "konplikatua" izan zela ikuspuntu ekonomikotik, eta hala ere, 2009an errebisatutako Plan Estrategikoak jasotzen zituen aurreikuspenak gainditu egin zituela esan du.
Errentagarritasunari begira
Hala, 19,3 milioiko emaitza operatiboarekin itxi zuen 2010eko jardunaldia, 2009an baino 8,9 milioi gehiago. Kooperatibaren ekintza nagusian, lerro zurian, 20 milioitik gorako emaitzak izan zituen, eta Ebitda 15 milioi eurotan hazi zen; kooperatibaren esanetan, "hobekuntza garrantzitsua" izan zen, eta hura egotzi zioten "ingurune konplikatu baten barruan enpresa modu irmoan errentagarritasunera begira" jarri izanari.
2011ko aurreikuspenek jasotzen dute salmenta bolumena %7,6 handitzea, eta produktu berriak garatzeko 46 milioi gehiago inbertitzea.