Lehenago, baina, ez ditu izenik aurreratu gura izan, nahiz eta 50 hautagaik parte hartu Bilduren gaurko aurkezpen ekitaldian, Kursaalen. Tartean, gainera, gure ibarreko aurpegi ezagun askoak ere izan dira: Pello Urizar arrasatearra bera, Lore Martinez aretxabaletarra, Ander Rodriguez arrasatearra… "Hor egon arren, guztiak akaso ez dira hautagaiak izango. Batzarretatik pasa aurretik ezin da ezer esan. Apirilaren 18an jakinaraziko ditugu, ordurako dena lotuta izango dugulako, gauzak ondo egin nahian", gaineratu du Urizarrek.
Demokrazia eta aldaketa
Kontuak kontu, "benetako demokrazia" eta "benetako aldaketa" Bilduren eskutik etorriko direla, horixe nabarmendu dute Kursaalen egin duten ekitaldian. Ordubete inguruko ekitaldia izan da, eta aretoa lepo bete da. Bilduren haria gizarte osora zabaltzeko mezua ere helarazi dute.
Eusko Gudariak eta Internazionala abestu dituzte ekitaldia amaitzeko eta kalejiran atera dira. "Pentsa, dantza ere egin behar izan dut amaierako kalejiran, baina giro ederra izan dugu", kontatu du Pello Urizarrek.