Euskalakari da Korrikaren leloa. Izan ere, euskara maite duena, ikasten eta erabiltzen duena, euskalakaria da. Herritar guztiak euskalakari izango diren Euskal Herria da Korrikaren azken helmuga.
Patxi Uribarreni omenaldia
Korrikaren 17. ekitaldiak Euskaltzaindia omenduko du; 1919an sortu zenetik euskararen egitura linguistikoa eta gramatikala eraikitzeko lan etengabea egin du, eta 1968an euskara batuaren arauak zehazten hasi zen. Horrez gain, ezin ahaztu euskalkien alde egindako lana: ondare hori jasotzen asmatu du, besteak beste dialektologiari buruzko hainbat ikerketa eta Euskararen Herri Hizkeren Atlasa argitaratu dituelarik.
Hori dela eta, eguenean bertan Patxi Uribarren euskaltzain aramaioarra omenduko dute Arrasateko ekitaldian, 18:30ean plazan. Aramaioko Etxaguen auzoan jaiotakoa, joan den maiatzaren 28an euskaltzain oso izendatu zuten Uribarren haren jaioterrian. Zirelako gara, garelako izango dira sarrera- hitzaldia egin zuen Patxi Uribarrenek egun horretan.