1. Noiz esan zenuen, "ama, artista izan gura dut"?
Amak esan zidan: "Antzerkia ikas ezazu ez baduzu ikasten jarraitu nahi; bestela, lanean hasi. Bietako bat!". Amari esker naiz artista.
2. Eta ordutik inoiz pentsatu duzu, "isilik egon izan banintz..."?
Antzerki estreinaldietan eta zuzeneko saioetan, ia beti! Horretan ere lezioa eman izan dit amak: "Zuk aukeratu duzu lan hori, horrekin bizi izaten jakin behar duzu!"
3. Telebista, zinema eta antzerkian izan zara Ixabel. Zurekin daroazu?
Pentsatzen nuen bizitza guztian izen horrekin geldituko nintzela; Hala ere, aspaldi kendu nuen nire soinetik Ixabelen figura. Baina ni neu nahiko Ixabel banaiz: katiuskak eta soinekoa janztea gustatzen zait, belazean filosofiako liburuak irakurtzea...
4. Anne Igartiburuk ezer esan dizu Urtezaharreko ordezkatzeagatik?
Ordezkatzea? Faborea egin nion: Gabonen bueltan haren izena leku guztietatik entzun behar izan nuen! Gainera, beti esaten du EITBra bueltatu nahiko lukeela... Ba, harrapazan!
5. Zer da errazagoa, imitatzea ala sortzea?
Inguruan ikusten ditudan pertsonaiak imitatuz, pertsonaia sortzea. Bestalde, ez dut oso gogoko pertsonaia ezagunak imitatzea.
6. Ondo pasarazteko ondo pasatu behar du norberak?
Nik bai, behintzat. Oso gogorra egiten zait zerbait antzeztea niri ez badit graziarik sortzen. Antzeman egiten da. Guztiz pletoriko ez zauden egunetan, zeuk animatu behar duzu zure burua.
7. Orain, Finlandian. Zergatik han, eta ez Etiopian edo Australian?
Eta zergatik han, edo Etiopian? Eta zergatik ez, bada, Finlandian? Bada esaldi bat: "Zergatik? Ba, haatik!". Horixe, ez duelako arrazoi edo argumenturik.
8. Bi neska umorezko programa bat gidatzen ez da egunero ikusten den zerbait...
Egia esan, ez. Anjel Alkainek argi zuen bi neska nahi zituela horrelako saio bat gidatzeko; batez ere, horrexegatik, ez delako egunero ikusten den zerbait. Harro nago hark hartu duen erabakiaz.
9. Zizurkildar moduan, ze herri eta zertara desafiatuko zenuke?
Villabona! Garai batean bi herrietako alkateak mozkortu eta tren-geltokia Zizurkilek Villabonari saldu ziola esaten da. Gauzak argitzeko, mozkor lehiaketa bat antolatuko nuke: azkenera arte irauten duen herriak tren-geltokiari herriaren izena emango lioke duintasun osoz.
10. Eta drama bat, noizko?
Nork eskaini zain nago! Gustura egingo nuke drama; gainera, neure burua ez dut umoristatzat.
---------------------------------------------------------------------
Lehendakaria banintz...: "Ea asmatzen dudan... Erakunde, biltzar edo elkarte bateko burua izango nintzateke. Baldintza hipotetikoa da, ezta? Dena den, nik nahiago baldintza hipotetiko ez burutuan formulatutako esaldia... Ez, orain serio erantzunda, erraza: orain artekoak izan diren moduan izaten jarraituko nuke; hau da, aktore".
