Eskaera oso argia izan zen: "Talde multidiziplinarra behar dugu, gaztea, baina horrelako erronka bat aurrera eramateko bezain zoroa", eta gaineratu: "Minimalistarik ez, mesedez". Natali Canas del Pozo arkitekto arrasatearra talde gazte eta multidiziplinar horretako kide izan da.
Bezero ausartak
Canas del Pozo oso pozik dago bizitako esperientziarekin: "Oso esperientzia polita izan da. Oso bezero bereziak izan dira; oso parte-hartzaileak. Askatasun handia geneukan gauzak egiteko orduan, baina eurek ere ideia asko ekartzen zituzten mahai gainera. Oso ausartak dira; hiru arkitektoak oso gazteak gara eta ez gara horren ezagunak. Arriskatu egin dira beste behin ere. Uste dut euren arrakastaren zati inportante bat hor dagoela. Arriskuak hartzen dituzte", kontatu digu arrasatearrak.
Talde sortzailearekin arriskatu duten neurrian, proiektuarekin ere gauza bera gertatzen da: "Argi zeukaten zerbait berria izan behar zuela. Adria anaiek nahi dutena da jatetxera joaten garen bakoitzean esperientzia berri bat bizi izatea. Ez zuten estilo minimialistarik nahi; hori ere argi zeukaten. Izan ere, azkenaldian ireki diren jatetxe gehienek estilo minimalista edo japoniar kutsua daukate. Uste dut lortu egin dugula bezeroek nahi zutena".
Agertokia eta 'backstage'-a
Adria anaiek espazio bakar baten bi proiektu batu dituzte eta Canas del Pozok kontatu digu, diseinuari dagokionez, bata agertokia litzatekeela eta bestea atzeko aldea: "Tickets jatetxean tapen estiloko eskaintza daukate. Estilo barrokodun espazioa da eta hainbat barra ditu –feria baten kioskoen antzerakoak–. Barra bakoitzean estilo bateko jakiak ematen dira: barbakoa batean, sushia bestean... Espazio hori antzerki areto bateko agertokia izan daiteke. Bigarren espazioa snackak ematen dituzten kokteleria da. 41º (41 gradu) du izena. Industrialagoa da, Tickets-en backstage-a litzateke. Zinemako plato abandonatua dirudi".
Gutiziak probatzen lehenak
Adria anaien jatetxe berriak martxoaren 1ean ireki zituen ateak, baina Canas del Pozok aurretik probatu ahal izan zituen gutiziak: "Ireki aurretik, bi astean sukaldeko probak egiten ibili ziren eta menua probatzeko ohorea izan genuen. Oso gomendagarria".