Eusko Jaurlaritzak "bikaintzat" jo ditu datu horiek, eta esan du bere "estrategia berriarekin uztartzen" direla: 2010. urtean, marka turistiko berriaren diseinuarekin eta Euskadi, goza ezazu leloarekin, Euskadi bere indarretako baten gainean posizionatu ahal izan da, emaitza arrakastatsuekin. Era berean, Jaurlaritzak Marketin Plan berri bat onartu du, sustapen-politika berriekin eta Euskadiko turismo-produktuen definizio berri batekin, gure potentziala sendotzeko aukera emanez. "Era berean, Euskadi atzerrian sustatzeko Turespañarekin egindako
lankidetzaren emaitza positiboak nabarmentzen dira", baloratu du Eusko Jaurlaritzako Turismo sailak.
Datuen azterketatik zenbait ondorio atera ditu Turismo sailak. Besteak beste, Euskadik 19 hilabeteko hazkunde jarraitua darama, turisten sarrerari dagokionez. 2009. urteko uztailean hasi zen joera-aldaketa hori.
Gipuzkoan, %4 sarrera gutxiago
Lurraldearen arabera, urtarrilean Araban sarrerak % +5 hazi dira eta % +10 Bizkaian, baina Gipuzkoan % -4 murriztu. Ostatu-gauei dagokienez, Araban % +26ko hazkundea izan da, Bizkaian % +11 eta Gipuzkoan % -3ko beherakada.
Hiriburuei dagokienez, Gasteizen hazkunde ikusgarriari eutsi zaio, sarreretan % +7 eta ostatu-gauetan % +30 handitu baita. Bilbon, sarrerak % +6 eta ostatu-gauak % +8 handitu dira; aldiz, Donostian, bidaiarien sarrerak %-4 eta ostatu-gauak % -3 murriztu dira.
Sektorearendako laguntza gehiago
Datu horiek ikusita, Eusko Jaurlaritzak esan du "batez besteko egonaldia eta gure bisitarien gogobetetze-maila handitzeko gako-elementuak landu" nahi dituela, eta "sektoreari laguntzen jarraituko" duela, sektorearen lehiakortasuna indartu nahi duten laguntzak eta diru-laguntzak emanez, Euskadiko Turismoaren Lehiakortasun eta Berrikuntza Planean erabakitakoaren ildotik.