Txatxilipurdi, Jardun eta Debabarrenako Pil-Pil elkarteek bat egin dute aurten Udako Abenturak antolatzeko. Gero eta eskarmentu handiagoa dute zeregin horretan eta aurten ere 10-16 urte bitarteko gazteek izango dute non gozatu uztailean.
Hiru eskaintza
10-12 urte bitarteko gazteek Bermeoko Almike auzoan dagoen aterpetxera joateko aukera izango dute. 20 lagunendako 10 eguneko bi txanda antolatu dituzte; uztailak 2-10 eta uztailak 10-18.
12-14 urte bitarteko gazteek Txatxilipurdi elkarteak antolatzen duen Orioko kanpaldian parte hartzeko aukera izango dute. Hemen ere bi txanda antolatu dituzte; uztailak 1-11 eta uztailak 11-21. Gainera, eta nobedade moduan GaraiOn udalekuak izango dituzte aukeran adin honetako neska-mutikoek. Garaio urtegiaren inguruan astebeteko kanpaldia uztailaren 14tik 21ra.
14-16 urte bitarteko gazteek, berriz, Arabatik Gipuzkoara mendiz mendi egiteko aukera izango dute uztailaren 5etik 16ra.
Kalitateko aisialdia euskaraz
Bailarako euskara elkarteek urteak daramate haur eta gazteei kalitatezko aisialdi hezitzailea eskaintzen, beti ere euskararen erabileraren iparra bistatik galdu gabe. Xehetasun gehiago behar izanez gero jo Txatxilipurdira (943 - 79 54 46) edo Jardunera (943 - 76 36 64).