Bukatzear dago gripearen kontrako aurtengo sasoia. Infekzio datuak geroago eta urriagoak dira, eta hilabete amaierarako osasun adituek bukatutzat emango dute gripe-sasoia.
Urtarrileko bigarren astea
Aurten, urtarrilaren bigarren astean izan du gripeak eraginik handiena; “iaz, berriz, urriko azkeneko astean izan zuen, maiatzean hasi zelako A birusaren pandemia”, adierazi du Mertxe Gabari medikuak.
Sei lagun ospitaleratuta
Adin tarteari dagokionez, berriz, 0-14 eta 25-44 urte bitartekoei eragin die batez ere; “sexuei begiratuta, berriz, berdin gizon edo emakumeei”; eta ospitaleratze kopuruari dagokionez, berriz, sei kasu bakarrik ospitaleratu behar izan dituzte Debagoieneko Ospitalean, “42-72 urte bitartekoak ziren eta arrisku faktoreak zituzten guztiek. Bestalde larrialdiarengatik lekualdaketa bakarra egin behar izan dugu, Gasteizera”, kontatu du Gabarik.
Iaz baino %4 txerto gehiago
Txerto kontuei dagokienez, berriz, guztira 11.950 txerto ipini dituzte aurten, “iaz baino %4 gehiago”. Ezaugarriei begiratuta, %80 izan dira 65 urtetik gorakoak;%64,8 bronkitis kronikoa dutenak; %60,1 diabetikoak eta egoitzetan edo bestelako erakundeetan ingresatuta daudenen artean %95ak jaso du txertoa.