Datu ekonomikoez gainera, baina, bestelakoak ere jakinarazi dituzte, sektorearen indarra azpimarratzeko. Adibidez, “gizartearen informazio eskubidea asetzeko bidea ematen” duela; “hizkuntza normalizaziorako eragile nagusietakoak” direla; lanpostuak sortzen dituztela eta sektore horrek “jasotzen dituen laguntza publikoetatik zati handi bat berreskuratzen duela gizarteak baita parametro ekonomikoetan ere”.
Prekarietatean lanean
Hala eta guztiz ere, salatu dute “krisi ekonomikoak gogor astindu dituela euskarazko hedabideak” eta biziraupena hedabideon “erdigunean kokatu” dela. Nabarmendu dute 30 urteotan lanean dabiltzala eta erakundeek “aspaldi aitortua” diotela sektoreari “euskara eta euskal kultura sustatzeko zereginean duen estrategikotasuna”. Hala ere, “egungo laguntzek kasurik onenean prekarietatean bizirauteko aukera eskaintzen” dietela salatu dute.
Publizitate instituzionala
Horregatik guztiarengatik, laguntzetan baliabide handiagoak aldarrikatu dituzte; “egungo laguntza deialdiaren dinamikatik bide egonkorragoetarako urratsa egin beharra” dagoela adierazi, eta publizitate instituzionala egiterako orduan “beste politika bat” eskatu, “instituzioek eta erakunde nagusienek ez dutelako euskarazko hedabideen indarra kontuan hartzen”.
Politikari eta instituzioekin elkartzeko asmoa
Hori horrela, iragarri dute aurrerantzean euskarazko hedabideek elkarrekin ekimenak egiten segituko dutela. Webgunea sortu dute halakoen berri emateko: www.blogak.com/hedabideak. Eta martxoa eta apirila bitartean instituzio eta alderdi politikoetako ordezkariekin elkartzeko asmoa dute, “sektorearen berri zuzenean eman eta politika aldaketarako proposamenak” lantzeko helburuarekin.