Taldeka jokatu behar izaten dute bertsolariek bertso txapelketa honetan. Agirreazaldegi bergararra Donuletxi taldearekin aritu zen eta bere taldekideak Uxue ALberdi eta Onintza Enbeita izan ziren. Labaien arrasatearrak, bestalde, Donelontxo izeneko taldearekin hartu zuen parte eta Ander Lizarralde eta Unai Muñoaren laguntza izan zuen.
Agurra
Txapelketa honetan agurrak garrantzia berezia izaten du. Izan ere, bertsolariek etxetik eraman behar izaten dute prestatuta.
Nesken taldea jantzi mexikarrak soinean zituztela azaldu zen jendaurrera, korrido mexikar bat kantatuz.
Mutilen taldeak publikoa astoratu zuen munduko inprobisatzaileen bisitarekin. Lehenik Jokin Labaien azaldu zen Julian Iantzi aurkezlea imitatuz eta bertso lehiaketa bateko bikoteak aurkeztu zituen: batetik, Palestinako inprobisatzailea eta bere itzultzailea; eta, inprobisatzaile latinoamerikar bat eta Jon Sarasua, bestetik. Palestinarraren papera Ander Lizarraldek egin zuen eta barre algara ugari eragin zituen bere arabierak.
Umorea
Amaia Agirrek jarri zizkien gainontzeko ariketetan umorea izan zen nagusi. Bertso saio batzuk luzatu ere egin zituzten, jendea gustura zegoelako. Adibidez, Onintza Enbeita eta Unai Muñoaren arteko ligeek jendearen algarak sortu zituzten. Bi taldeek erakutsi zuten maila bikaina umore puntuan eta bata bertsoen kalitatean. Azkenean, neskak garaile eta mutilak aulkiaz konformatu behar. Ikusleek bozkatzen dute euren talderik gustukoena eta neskek 71 boto eskuratu zituzten eta mutilek 52.