Bi motatako mezuak eman zituen Iturbek atzo. Batetik, Kutxa "bakarrik" dagoela errepikatu zuen –"Ez gaude inoren mendean; geuk erabakiko dugu", esan zuen–; baina, era berean, hauxe esan zuen: "Gu apustu bat egiteko gertu gaude".
utxak urte honetarako duen helburua "kaudimen, likidezia eta irabazietan kutxa hobe bat lortzea" da. Xabier Iturbek azpimarratu zuen nortasun ezaugarri horiei eutsi beharra.
Kudeaketa-Planaren xehetasunei buruz erakundearen Zuzendari Nagusiak aritu ziren, Carlos Tamayo eta Fernando Martínez-Jorcano jaunak. Lehenak erresistentzia probak azpimarratu zituen, finantza erakundeek igaro behar izaten dituzten stress-testak alegia, eta nabarmendu egin zuen iazko uztailean horietan Kutxak lortutako emaitza, simulazioan parte hartu zuten beste kutxa eta bankuek lortutakoekin azterketa konparatiboa eginez. Konklusio gisa, Tamayok adierazi zuen "errentagarritasunak eta likideziak sendotasuna" emango ziela Kutxari.
Ekitaldi zaila izango da
Martínez-Jorcanok, bere aldetik, aurreratu zuen 2011koa aurreko ekitaldiak bezain zail datorrela, eta larriagotu egingo direla zailtasunetako batzuk. Ondoren, BAI Planaren ildoetan lana gogotik egiten segitzea eskatu du, irabazi errepikaria eta egiturazko likidezia izanik horretan helburu behinenak.
AFIren (Analistas Financieros Internacionales) presidente Emilio Ontiverosek Kudeaketa Planaren aurkezpen ekitaldia ireki zuen, Paisaje después de la batalla. La industria del sector servicios financieros tras la crisis hitzaldiarekin.