Edozelan ere, gaur goiz partean dira hitzordu gehienak: Aretxabaletan, adibidez, 09:00etan bedeinkatuko dituzte opilok, konbentuan eta 10:30ean elkartuko dira Apotzaga auzoko Salluente ermitan, 11:00ak inguruan opilak bedeinkatzeko.
Bergara, Eskoriatza eta Elgeta
Bergaran, berriz, Murinondo auzoko jaiak direla-eta, han ere egin dute opilak bedeinkatzeko hitzordua: 11:00etan, ermitan.
Eskoriatzan arratsalde partean izango dira bedeinkapenak: 18:00etan zaharren egoitzan eta 19:00etan, parrokian.
Bestalde, Elgeta aldean ere badute tradizio handia San Blas opilak egin eta bedeinkatzeko. Bada, han iluntzean dute mezetarako deia.
Antzuolan, ogia
Eta Antzuola izango da San Blas opilak bedeinkatzen azkena, zapatuan egingo dute-eta meza, San Blas ermitan, 12:00etan. Gainera,Antzuolan ez dituzte San Blasetako ohiko opil zuriak bedeinkatzen, baizik eta ogi erroskilak eramaten dituzte, koskadunak zapi batean batuta, bedeinkatzeko.
Eztarria sano mantentzeko
Eta jakina, orokorrean, opilez gainera, bestelako jakiak ere eramaten dituzte herritarrek bedeinkapen ospakizun horietara: laranjak, eztarrirako kordelak, gatza, San Blasak egiteko osagaiak… beti ere, eztarria sano mantentzeko helburuarekin, hori da-eta, San Blas zaindariari aitortzen dioten boterea.