Agustin Markaide (Arrasate, 1957) Eroski Taldeko zuzendari nagusia izan da azkeneko urteotan. Taldeko bazkideek iazko ekainean egin zuten batzar orokorrean onartu zuten Agustin Markaide izatea hurrengo presidentea.
Deustuko unibertsitatean zuzenbidean eta enpresagintzan lizentziaduna da Markaide. Mondragon Taldeko kongresuko burua ere bada.
Eroskik 2.367 saltoki ditu gaur egun:
- 113 hipermerkatu.
- 1.063 supermerkatu Eroski/Center, Eroski/City eta Caprabo.
- 58 gasolindegi.
- 224 Eroski bidaien bulego.
- 40 Forum kirol denda.
- 289 IF lurrindegi.
Horretaz gain, 19 cash-carry eta 32 logistika-plataforma ditu. Eta beste 481 denda frankizian. Frantzian, taldeak ditu 4 hipermerkatu, 16 supermerkatu eta 17 gasolindegi. Eta, Andorran, 4 IF lurrindegi.
Bezeroen beharrei hobeto erantzun
Etorkizunean, Eroski Taldeak nahi ditu "bezeroen beharrei" hobeto erantzungo dien saltokiak, "prezio onaz" gain aukeratzeko "eskaintza zabala" izango dituenak. Hau da, Eroski "lehiakorrago eta erakargarriago" bihurtu nahi du datozen urteotan Markaidek.
Aliantzak nekazari eta abeltzainekin
Estrategia horretan, epe luzerako aliantzak bilatuko ditu ekoizle nagusiekin, bereziki, "nekazari eta abeltzainekin". Horretaz gain, talde osoa kooperatiba bihurtzeko prozesua amaituko du, langileen parte hartzea eta langile eta bezeroen arteko harremanak bultzatuko dituen "enpresa indartsu" bilakatzeko helburuarekin.