Enpresa pribatuan eta hezkuntzan greba ia-ia erabatekoa dela adierazi digute LAB eta ELA sindikatuetatik. Debagoieneko Ospitalean larrialdi zerbitzua bakarrik dago martxan. Orain, komertzioen eta banketxeen erantzunaren zain dira sindikatuetako ordezkariak.
Bergaran, esaterako, erantzuna %100ekoa dela adierazi digu Jose Ramon Kortabarria Moztu LABeko delegatuak. Enpresa handien kasuan, TTT izan ezik, gainerakoek greba egin dutela adierazi digu. Geyser, Metagra, Iraundi, Lacor, Rodamientos Eder, Candy, Lazpiur, Arcelor, Torunsa edota Tornilleria Deban greban dira.
Era berean, Oñati eta Arrasate "geldirik" daudela esan digu Patxi Zubizarreta ELAko ordezkariak. Arrasaten, Gelman lanean dira eta Polmetasaren kasuan %40 dago lanean. Hainbat kooperatibaren kasuan gehiegizko zerbitzui minimoak jarri dituztela salatu dute sindikatuek. Goizean goizetik, bostak ingurutik, ibili dira piketeak eta Ertzaintza ere bai. Edozein modutan, ez da inolako arazorik egon orain arte. Egoera erabat lasaia zen 07:00etan Bergarako Labegaraietako industrialdean eta San Juan edo Arrasateko Kataiden. Mondragon Taldeko Egoitza Nagusirako sarreran piketeak zeuden zazpi t´erdiak aldean; 20 bat lagunek txistuekin eta pankartekin hartzen zituzten handik autoetan lanera igotzen zirenak, grebara deituz.
Zerbitzuak
Udalei dagokienez, bailarako herri guztietan egin dute greba Leintz Gatzagako udaletxean izan ezik. Arrasaten herri barruko autobusak %30eko maiztasunarekin ibiliko dira. Lurraldebusek atzo iragarri zuenez, zerbitzuen %30 eskainiko du gaur.
ELA, LAB, EHNE, HIRU eta EILASEk deitu dute gaurko greba pentsioen erreformaren aurka eta, besteak beste, Ezker Abertzaleak, Eusko Alkartasunak, Aralarrek eta Alternatibak bat egin dute greba deialdiarekin.
Oñati: Enpresa handienek, Udalak, hezkuntzak eta merkatariek greba
Arrasate: Arrasateko zerbitzu asko itxita, greba dela-eta
Bergara: Bergarako enpresa gehienak, grebara
Aretxabaleta: Zerbitzu gutxi izango da gaur, grebaren ondorioz
Eskoriatza: Greba igarri da herrian
Antzuola: Udal zerbitzuak itxita, greba dela-eta
Elgeta: Elgetako udal zerbitzuak itxita, greba dela-eta
Debagoiena: Kooperatiba askotan greba