Portzentaia horiek erakundearen core capital delakoari dagozkie; hau da, erakundeak une jakin baten erabil dezakeen kapital portzentaia. Kutxaren kasuan, bere kapitalaren %12,3 erabili ahalko luke momentu honetan ustezko zor batzuei erantzuteko. Zapaterok gutxieneko %8ko core capital bat izatea eskatzen die aurrezki kutxei, saneatuta daudela kontsideratzeko. %12,3ko datu hori Fitch kalifikazio-agentziak eman du.
EAEko gainerako kutxak ere ondo kokatuta daude. Hala, Vital Kutxak 2010eko jardunaldia %11,6ko core capitalarekin itxiko du. BBK-k oraindik ez ditu bere emaitzak jakinarazi, baina adituek diote %9 eta %10 artean izango dela bere portzentajea.
Sektorea berregituratu
Bere 2011ko txostenean, Fitch agentziak Espainiako banku-sektorea "egonkor" dagoela esaten du, baina aurrezki kutxen sektorea berregituratzea gomendatzen du. Era berean, Kutxaren balorazioan, A- kalifikazioa ematen dio epe luzerako emisioetan. Fitch-ek Hego Euskal Herriko eta Espainiako banketxe eta aurrezki kutxen kalifikazioak etenbarik aldatzen ditu. Hiru faktore aipatzen ditu sektore horren egoera azaltzeko: krisi orokorra, sektorea higiezinen inbertsioetan sartuta egotea, eta Espainiako banka sektoreak nazioartean momentuan duen irudi txarra.
Beste kalifikazio-agentzia batek, Standard & Poor's-ek, kalifikazio zertxobait hobea eman zion Kutxari joan den ekaineko txostenean: 'A' kalifikazioa, lehendik zeukan 'A+' zertxobait jaitsita. Kutxak normaltzat jo zuen beherapen hori: "Denei gertatzen ari zaien zerbait da", esan zuten Kutxako arduradunek.
Estatua banketxeetan sartuko da
Espainiako Gobernuak epe bat zabaldu du Hego Euskal Herriko eta Espainiako aurrezki-kutxek euren kabuz kapital pribatua lor dezaten. Irailean horretarako kapaz izan ez diren aurrezki-kutxak banku bihurtzera behartuta egongo dira, Espainiako Estatua euren kapitalean sar dadin; praktikan, banku horien nazionalizazioa suposatuko du horrek. Kutxek lortu beharreko kapitala 20.000 milioikoa izan behar da, asko jota.