Urtero moduan, ibarreko kirolari onenak saritzea baino haratago joan nahi du ekimenak: "Urtean zehar lan ona egin duten kirolariak saritu, baina urtean behin ez bada ere, boluntario moduan kirolaren alde lan egiten dutenak ere errekonozitu nahi ditugu", adierazi zuen aurkezpenean epaimahaiko kideetako batek, Asier Muxika Kirol teknikariak.
Izen handiko kirolariak
Gizonezko eta emakumezko kirolari onenak gaur bertan izendatuko dituzte, ekitaldian. Eta sei hautagai daude horretarako: Alberto Iñurrategi, Markel Irizar eta Beñat Arnaitz. Emakumezkoetan, berriz, Maider Unda, Jone Elortza eta Ane Sanz de Galdeano dira hautagaiak.
Erabakita dauden sariak
Beste saritu batzuk, berriz, erabakita daude. Eta, aukeratutako horien artean sari berezia jasoko du Aitor Zabaleta bergararrak, horrenbeste urtean Eukal Herriko errepideetan Lola BMW autoarekin egindako lanagatik: "Bada, urte gogor hauetan ondo hartzen dira errekonozimendu hauek; izan ere, gizarte osoak bezala, kirol munduan gabiltzanok ere nabarmen igarri dugu krisialdia. Azken bi urteotan halamoduz lehiatzen ibili gara, ezinezkoa da babeslerik topatzea, inork ez du dirurik, eta, babesle asko lagunak baditut ere, inork ez du duro bakar bat ere".
Hala ere, Bergarakoak aurreratu digu 2011n errepidean lehian izango dela: "Autoa etxe ondoan dut eta aurten ere Euskadiko txapelketako lasterketa gehienetan izango gara; sailkapen orokorrerako derrigorrezkoa da proben %70ean puntuatzea".
Zabaletarekin batera, sarituen artean daude Sustrai Aloña Mendi saskibaloi taldea, Alberto Garai kirol medikua eta Ford Mugarri enpresa. Kirolari anonimoaren saria ere gaur emango dute aditzera, eta adi, herritarren sarirako sarean proposamen mordoa jaso dugu-eta. Ekitaldia astelehenean izango da ikusgai (20:45) Harmailatik berezian.