Izan ere, Euskadiko stand-ean, Berde eta Naturala izenburupean aurkeztuko dute Gipuzkoa barnealdeko eskaintza, eta hortxe aurkituko dute bisitariek Debagoieneko informazioa: “Inaziotar Lurraldea, ibilbide kulturalak, naturalak eta mendi-ibiliak”, Ana Herizen, Debagoieneko Mankomunitateko turismo teknikariaren esanetan.
Mendia, kultura eta gastronomia
Gaineratu du, aurten batez ere, mendi-ibilietan eta naturan oinarrituko dela Debagoieneko eskaintza, “modan dago, eta jendeak ondo hartzen du. Laguntzen du Debagoiena Berdea eta Naturala izeneko eskaintzaren barruan egoteak, izan ere, hona mendi-ibiliak egitera datorrena kultura ekimenak egiteko ere aprobetxatzen du, eta gastronomiarengatik ere gero eta gehiago galdetzen dute”.
Trukerako azoka
Mankomunitateko ordezkaritzaz gainera, gure eskualdeko bestelako ordezkariek ere parte hartuko dute Fiturren, Oñatiko turismo bulegokoek, adibidez. “Bisitari moduan-edo joango gara, beste profesional batzuekin egoteko: Vallde'Uixo (Castellon) kobazuloetakoekin, Zugarramurdikoekin (Nafarroa), Huelvako Cueva de las Maravillas-eko kideekin…mendi-ibilien gaineko informazioa ere eramango dugu… Azken batean, azoka guztiak moduan, Fitur elkargune bat da, proiektu berriak, kolaborazioak, informazioa… trukatzeko”, adierazi du Ikerne Altubek, Oñatiko turismo bulegoko arduradunak.