Gureko dendariek ere ondo sumatu dute egutegiak eragindakoa. Hala ere, dendariek diote eragina uste baino txikiagoa izan duela horrek. "Jendea Bilbo eta Gasteizera joan dela igarri" dela diote, adibidez, Arrasateko Jifh gazteentzako arropa dendakoek, "baina jendea ibili badabilela" eta Lasagabaster dendan "aurreko urteetan baino hobeto" hasi direla diote. Oñatiko Chic-en ere "zubiaren eraginaren beldur" ziren eta azkenean "oso ondo" batekin erantzuten diote lehenengo egunak zelan joan zaizkien galdetuta. "Horretan %40ko deskontuekin hasi izanak ere izango du eraginik", aitortzen dute.
Hasteko, %30-40ean
Lehenengo bi asteetan %30eko beherapenari eutsi ohi diote komertzio gehienetan eta hortik aurrera astez aste jarraitzen dute prezioa jaisten. Arrasateko Lasagabasterren, ostera, gaur %50eko deskontuekin zabalduko dute zuzenean eta Oñatiko Loramendin asteburuan jada izan dituzte jantziak erdi prezioan. Bergarako LZE-en ere %50eko beherapenarekin hasi dira zenbait jantzitan eta hemen ere asteburuan zehar "oso lanpetuta ibili" dira, "batez ere egubakoitz arratsaldean eta zapatu eguerdian".
Gabonetako kanpaina eskasa
Gabon kanpaina eskas baten ondoren datoz aurtengo beherapenak eta nabari ei da oso artikulu zehatzen bila dabiltzala bezeroak deskontu onen zain.