Eklipsea goizeko zortziak hamar gutxiagotan hasi da, baina Euskal Herrian ordubete geroago atera da Eguzkia, eta, beraz, atera denerako zati bat estalita zuen. Eklipsearen puntu gorena bederatziak inguruan izan da, horizontetik oso gertu zegoela, 2º-ko altueran. Hala ere, Gorla gainetik ezin izan da eklipsea 9:30ak ingurura arte ikusi lainoak baitzeuden.
Europa iparraldean estali du gehien ilargiak eguzkia % 75 inguru eta Madrilen, adibidez, %57. Bittor Rodrigez elkarteko kideak esan digu hemen ilargiak eguzkiaren azalera osoaren %40 inguru estali duela.
Aparatu bereziak erabili behar izan dituzte elkartekoek eklipsea ikusteko. Izan ere, eklipsea ezin zitekeen begi bistaz nabaritu eta beharrezkoak izan dira prismatiko edo teleskopioak, betiere egokitutakoak eta babestutakoak.
Horretaz gain, beharrezkoa izan da toki altu batera joatea, eguzkia oso baxu baitzegoen. Horregatik Ilatargi Astronomia elkartekoak goizean goiz jaiki dira Gorla gainera joateko eta aparatu guztiak muntatzeko. Hotza ere pasa dute, baina pozik geratu dira, denbora luzez zerura begira egon ostean, lainoek utzi baitute eklipsea ikusteko zirrikitu txiki bat.