Bergara eta Oñatiko jolas-parkeak gaur ireki dituzte. Bergarakoa, udal pilotalekuan ipini dutena, 2-10 urte arteko umeendako da eta eguneko sarrera 3 euro da, eta hiru egunetakoa, 7 euro. Ordutegia honakoa izango da: 11:00etatik 13:00etara eta 17:00etatik 20:00etara. Urtarrilaren 5ean, Kabalgata egunean, jolasparkea 19:00etan itxiko da.
Oñatikoa ere gaur eta bihar egongo da zabalik, 11:00-14:00 eta 16:30-20:00etara, 4 eurotan egun osoa eta 2,5 euro egun erdia.
Jolas-parkeetan beteranoena Arrasateko Txikilandia da eta, hain zuzen, bihar ospatuko dute Txatxilipurdikoek parkearen 20. urteurrena. Aurtengoari dagokionez, atzo ireki eta bihar arte egongo da zabalik, goizeko 11:00etatik 14:00etara eta arratsaldeko 16:00etatik 20:00etara. Biharko egunari dagokionez, 20 urte hauetan lanean jardun duten arduradun eta langileak omenduko dituzte eta egunari amaiera emateko zirkoa antolatu dute: clown ikastaroarekin, hanka-paloekin, malabar ikastaroarekin eta pailazoekin.