400 euro kilometroa
AEKko Gipuzkoako arduradun Oskar Elizbururen esanetan, datorren urtarrilean hasiko dira herri batzordeak osatzen. "Gipuzkoako Korrika arduradunen bilera urtarrilean izango da, eta horren ostean hasiko gara herri batzordeak sortzen. Kilometroak saltzen ere orduan hasiko gara. 400 euro balio du bakoitzak eta erosteko bideak betikoak dira: AEKko euskaltegira deitu edo herri batzordeak egiten direnean arduradunari esatea", zehaztu du Elizburuk. "Batzorde horietan erabakiko da herri bakoitzean zer eta nola egin, eta noski, laguntzaileak edozertarako onartuko ditugu: kartelak jartzeko, Korrika laguntzaileak egiteko ..." jarraitu du Oskar Elizburuk.
Hain justu, Korrika laguntzaile kanpaina martxan da dagoeneko eta materiala ere salgai dago AEKko euskaltegietan. Materialaren lehenengo multzoa da, "oso arropa erakargarria", Elizbururen esanetan. Santamas egunean, gainera, postu bat jarriko dute Arrasateko plazan, talogileen ondoan.
'Euskalakari'
Maitatu, ikasi, ari ... euskalakari lelopean abiatuko da Korrika 17 Trebiñutik 2011ko apirilaren 7an, eta Donostian bukatuko da apirilaren 17an, bi mila kilometrotik gora egin ostean. Aurten Euskaltzaindia omenduko du. "Bada garaia bere lana herri mugimenduak onartzeko", Edurne Brouarden esanetan.