Urtebeteko lana
Urtebete da Hamaikabat taldea sortu zutela. Horren harira, balorazio positiboa egin du Bengoak: "Nahiz eta alderdi berria izan, gure jendea lehen EAn zegoena da. Esperientzia handiko jendea eta lan handia egindakoa da". Eraikitzen eta hazten ari den alderdia dela gaineratu zuen Bengoak. "Alderdiko egiturak sendotu, Gipuzkoa mailan egitura handitu eta jendea erakartzea da asmoa", azaldu zuen.
Erronka: langabezia
Martin Beramendi Gipuzkoako presidenteak Hamaikabatek Debagoienerako dituen asmoak azaldu zituen: " Krisi garai honetan langabeziari aurre egitea da erronka nagusia, Gipuzkoa osoan bezala. Guk baditugu ardurak Gipuzkoako Foru Aldundian, bai ogasunean, baita gizarte gaietan eta baita berrikuntzan ere. Hiru sail horietatik ahalik eta ekimen handienak egiten ari gara: poligono berriak sortu, enpresak lagundu…".
2011n hauteskundeak
"Hamaikabaten asmoa EAJrekin aurkeztea" izan den arren, EAJk uste du Hamaikabat "hauteskundeetan kontrastatuta ez dagoen" alderdia dela; horregatik, bakarrik aurkeztuko dira. "Gure lana alderdia indartzea da udal hauteskundeei begira. Dagoeneko 20 hautagai inguru aurkeztu ditugu", dio Bengoak. Beramendik hau gaineratu du: "Abertzaletasuna sendotu egin behar dela esan dugu behin baino gehiagotan. Politika ezin da muturretatik egin".
Bakea lortzeko ahaleginak
Beramendik argi dauka bakea lortzeko ahaleginean ezin dutela ez ikusiarena egin edo eskatu behar direnak ez eskatu.