Errekorrak gaur gauean goialdeetan. Arantzazun, esateko, zero azpitik 5 ºC izan dituzte goizeko lehen orduetan; Leintz Gatzagako udaletxean jasotako marka berbera. Aramaioarrek jasan dute baina hotzik handiena -5,5 ºCko tenperaturarekin goizeko 9:00ean, udaletxean esan digutenez. Aparteko arazorik ez, baina.
Izotza eta gatza
Hotza bai, baina prezipitaziorik ezean izotzak ez du nabarmentzeko moduko eragozpenik sortu. Oñatin, Elgetan Arrasaten (kalealdean zein auzoetan), bada ezpada ere, gatza bota dute udaltzainek lehen orduan. Elgetan 06:00etan hasi dira gatza botatzen baina bitxia da Fernando Zenitagoia brigadetako buruak dioena, "seguruenik Arrasaten Elgetan baino izotz gehigo egin" duela.
Bergaran ez dute gatzik bota baina prest dauzkate Labegaraietako biltegian Astigarragatik ekarritako 4 tonak eta behar izatekotan auzoetan ere daukate gatza banatuta. Antzuolan ez dute, elurrik ezean, gatzik botatzen, zoruarentzat txarra dela baitiote. Hala ere, egurrezko zubiak itxi egin dituzte izotza desegin artean. Gainontzeko herrietan ere ez dute gatzik bota beharrik ez dutelako sumatu.
Biharko prestatzen
Goizaldeko ipar-haizea aurrerantzean menbedal ukituarekin hasiko da jotzen eta horrek tenperaturen zertxobaiteko gozatzea ekarriko du, gutxienez bai behintzat gradu bat edo bikoa. Arratsaldean baina zerua aldea goibeltzen hasi eta baliteke prezipitazio txikiak izatea. Gauerako eta bihar goizerako elurra espero da.