Manifestua irakurriz hasi zen hori, 18:00etan. Ohikoa den moduan, euskaltegiko ikasle batek irakurri zuen; Mario Alvarez mexikarrak, hain justu. Euskara geureganatzeko eta erabiltzeko deia egin zuen. Manifestuaren ondotik, argazkia atera zuten, eta jarraian, Basotxo abesbatzak emanaldia eskaini zuen. Kantaldia amaitzean, udaletxe zaharrera joan ziren guztiak, trikitixaz lagunduta. Gustura jan zituzten txistorra pintxo beroak, kantuan egin zuten bitartean.
Bailarako gainerako herrietan ere bestelako ekimenak egin zituzten. Txatxilipurdik antolatuta, Arrasaten, esaterako, Lip dub antzekoa grabatu zuten gazteek atzo arratsaldean. Eskoriatzan, Bergaran, Oñatin eta Antzuolan ere askotariko ekitaldiak izan zituzten egubakoitzean. Horien guztien berri aurkituko duzue biharko GOIENA paperean.