Gipuzkoan ezkerreko alternatiba abertzalea indartzea da, Rebeka Uberaren esanetan, Aralarrek egun duen erronka nagusiena, arrazoitu duenez, aukera hori indartzetik soilik etorriko delako lurraldea ezkerreko
politikekin gidatuko duen gobernu baten aukera sendotzea.
Uberak azpimarratu du Patxi Lopezen esanetan datozen maiatzeko hauteskundeak legebiltzarreko hauteskundeen bigarren buelta izango direla eta helburua dela PP-PSOE binomioa aldundietara eta udaletara eramatea. Aralarreko zerrendaburuaren esanetan, bere alderdia sendotzen ari den ezkerreko alternatiba abertzalea da horren kontra egiteko aukera eraginkorrena.
Aralarren lehentasunak aipatzeko orduan, Uberak esan du pribatizazioen kontra egitea, Gipuzkoarako azpiegitura egokiak, euskararen alde egitea, zaborren kudeaketa, garraio publikoa eta etorkinak izango direla , besteak beste, lehentasun horiek.
Herrietako zerrendaburuei dagokienez, urtarrila amaiera inguruan hasiko dituzte herri batzarretan hauek aukeratzeko prozesuak.
''Entzun nahi zaitugu'' kanpaina
Zerrendaburua aurkezteaz gain, gizartearen ekarpenak jasotzeko Aralarrek abiarazitako kanpainaren berri ere eman dute Arrasaten. Aretxabaletako alkatea Inaxio Garrok azaldu duenez, alderdiaren webgunea izango da kanpainaren ardatza, eta honetaz gainera hainbat sare sozialetan profilak sortu dituzte herritarrek ekarpenak egin ditzaten.
Baina kanpaina ez da Internetera mugatuko, herriz-herri ere ibiliko dira-eta herritarrekin bildu eta euren kezak eta proposamenak jakiteko.