Euskal zientzialari ezagunena izanda eta Bergarako Seminarioan egoitza duen unibertsitatearen ikasturte hasiera ekitaldiaren testuinguruan, ezin zitekeen bestela izan: Pedro Migel Etxenikek 1783. urtean Elhuyar anaiek han bertan egindako wolframioaren aurkikuntzari erreferentzia eginez hasi zuen 2010-11 ikasturtea irekitzeko lezioa. "Ezagutzarekiko pasioa. Unibertsitatea, etorkizunerako autobidea" izeneko hitzaldia egin zuen; ezagutzaren balioaz jardun zuen, zientziaz, baina baita euskarari eta Euskal Herriari buruz ere: "Gure herrigintzak etorkizunik izango badu, hezkuntzan, berrikuntzan, teknologian, zientzian eta euskaran oinarrituta izango da; euskarak eta Euskal Herriak gaur arte iraun badute euskaldunok aldi eta egoera berrietara egokitzen jakin dugulako izan da", esan zuen Donostia International Physics Center-eko presidenteak.
Etxenikerekin batera, Juanjo Alvarez izan zen ikasturte hasiera ekitaldiko beste protagonista nagusia. Ekitaldian izan ziren erakundeetako ordezkariek –Agurne Barruso alkatea, Markel Olano ahalduna, Iñaki Esparza UNED-Bergarako zuzendari berria eta Juan Antonio Gimeno UNEDeko errektorea– esker on hitzak izan zituzten hamalau urtez zentroko buru izan denarekiko; unibertsitatearen zilarrezko domina eman zioten Alvarezi.
Berba batzuk ere egin zituen zuzendari ohiak: "Bizitzaz gozatu dut hamalau urteotan". Eskerrak eman zituen, baita ikasleei zuzenduta ere, "UNEDen izate arrazoia".
Hain justu, 2008-09 ikasturtean ikasketak amaitu zituzten ikasleei diplomak eman zizkieten ekitaldiaren amaiera aldera. Urtetik urtera ikasle gehiago izaten ditu Bergarako UNEDek: iaz, adibidez, 3.000 izan ziren, aurreko ikasturtean baino %20 gehiago.