Aholkuak
Ariketa egitea eta elikadura orekatua funtsezkoak dira haurdunaldi osasuntsua izateko eta umekiaren garapen egokia lortzeko. Masajeak, bestetik, familiako giroa hobetzen laguntzen du eta lehenengo egunetik guraso eta haurraren arteko harremana hobetzen du.Aholku horiek eta beste asko biltzen ditu Debagoieneko Mankomunitateak haurdun daudenentzat argitaratu berri duen material didaktikoak.
Zorionak: ama izango zara da proiektuaren izena eta helburua euskara familia bidez transmititzea da.
Mankomunitateko euskara teknikariek, gainera, Eusko Jaurlaritzako euskararen normalizaziorako teknikarien laguntza izan dute proiektua garatzeko.
Liburua eta DVDa
Liburu eta DVD batek osatzen dute material didaktikoa. Liburuak bosta atal dauzka: haurdunaldiaren zainketa, erditze osteko zainketa, edoskitzea, masajea eta haurren zainketa. DVDak berriz, gai praktikoen azalpenak eskaintzen ditu.
Liburuaren eta ikus-entzunezkoaren diseinua Arteman Komunikazioa enpresak egin du.
Beste eskualdeetara hedatuko da
Egileen esanetan oso praktikoa, irakurtzeko erosoa eta erakargarria da Zorionak: ama izango zara DVD eta liburu bilduma. Guztira 1.500 ale argitaratuko dituzte. Lehenengo Debagoieneko emaginek haurdunei emango dizkiete, eta aurrerantzean Euskal Herriko beste zenbait eskualdetara hedatuko da. Osakidetzari ere aurkeztu diote proiektua eta oso harrera ona izan du.