Eusko Jaurlaritzak debekatu egin ditu bihar, zapatua, 15:00etan hasi eta domekan 15:00ak artean aire librean egin beharreko kirol jarduerak, bai eskola artekoak eta baita maila federatukoak ere.
Horrekin batera, jakin dugu bihar Bergaran egin beharreko eskola arteko gimnasia erritmiko txapelketa goizean bakarrik jokatuko dutela, eta arratsaldeko saioa bertan behera utzi dutela.
Futbolean, ohorezko erregionaleko Mondrak eta Bergarak ez dute zapatu arratsaldean jokatuko, eta klubetako ordezkariek adierazi digute ahaleginduko direla partiduok domeka arratsaldera atzeratzen –bestela Aste Santuan jokatu beharko dute-eta–.
Printzipioz, hirugarren mailan Aretxabaletak eta Laudiok domeka arratsaldean (16:30) Ibarran jokatu beharreko partiduan ez da aldaketarik izango. Ezta ere, kantxa barruan jokatu behar dituzten saskibaloi eta eskubaloi partiduetan (hori bai, seniorren kasuan, kategoria txikietan partiduak bertan behera utzi dituzte-eta). Hau da, Ford Mugarri Arrasatek normal jokatuko du zapatu arratsaldean Iturripen (16:30), eta saskibaloian Aloñako mutilek ere ez dute partidua bertan behera utziko (zapatua, 18:00).