Zapatuan atxilotutuako zortzi lagunak oraindik Lakuako komisarian segitzen dute. Mila Elortza, AHT Gelditu Elkarlaneko ordezkaria oraintxe da Gasteizerako bidean. Hark aditzera eman du espero dutela gaur bertan pasako direla epailearen aurretik.
Kontatu du zortzi lagunak daudela akusatuta desobeditzeagatik, atentatua egiteagatik eta desordena eragiteagatik. Eguerdian berri gehiago izango dutela ere esan du.
Ospitalera joan behar izan zuten zaurituen gainean, berriz, Elortzak esan du dagoeneko alta eman dietela zortziei.
Ehun lagun zaurituta
Protesta ekitaldia deitu zuen AHT Gelditu elkarlanak zapaturako. Urbinara joan eta trena eraikitzeko obretara manifestazioa egin zuten. Hura amaitu zenean, hainbat lagun obren eremuan sartu ziren; orduantxe kargatu zuen poliziak, elkarlanaren esanetan, modu “bortitzean”, automobilak manifestarien kontra bidalita eta manifestari taldeak porrekin kolpatuz.
Istiluak Urbinaraino iritsi zirela gaineratu du AHT Gelditu Elkarlanak, eta manifestari batzuk Urbinako batzar etxean babestu behar izan zutela euren buruak. Guztira, ehun zauritu baino gehiago izan ziren, tartean bazeuden baita ere gure eskualdeko herritarrak.
Manifestariak poliziaren kontra
Ertzaintzak emandako informazioaren arabera, berriz, hainbat manifestariak poliziaren kontra egin zuten, harriak eta bestelako objektuak bota zizkieten; hala desordenek aurrera egin ez zezaten, eta euren buruak defendatzeko manifestarien kontra kargatu behar izan zutela gaineratu du. Herrizaingo Sailak konfirmatu du goizean pasako direla atxilotutako zortzi lagunak epailearen aurretik.