Patronatuarekin Gipuzkoako zaharren egoitzetako langileen lan hitzarmena negoziatu nahian dabiltza, eta ELA sindikatuak salatu du Adegi eta Lares patronatuek ez dutela inolako borondaterik erakutsi langileen lan baldintzak hobetzeko. Abenduan hasi ziren lan hitzarmena negoziatzen; dagoneko hainbat bilera izan dituzte baina, momentuz, ez dute adostasunik lortu. Gaur goizean izan dute azken bilera, baina, ez da inolako akordiorik egon. ELA sindikatuak azaldu du Patronalak bere jarrera berretsi duela gaurko bileran, hau da, ez duela eskatutako hobekuntzarik onartuko hitzarmenean.
ELA sindikatuak azaldu du hitzarmenaren negoziaketan ondorengo edukiei ematen diela lehentasuna: oinarrizko soldata, subrogazioa, bajak, benetako lanaldia, jaiegunetako eta igandeetako plusa eta urteko lan egutegia.