Herri barruetatik tranbiak izango lukeen ibilbidea adosten dihardute Jaurlaritzak eta Debagoeineko udalek, Gereñuk adierazi duenez. Hainbat alegazio aurkeztu dituzte ibarreko udalek (azkena Arrasateko udalbatzarena, oraingo agintaldian) eta horiei soluzioa topatu beharko diete datozen hilabeteotan.
PSE-EE alderdiak Legebiltzarrera eraman zuen gaia ostiralean. Oscar Rodriguez PSE-EEko parlamentariak lanak oraindik hasi ez izana salatu zuen: "Jaurlaritzaren partetik utzikeria dago tranbiaren proiektuan. Jaurlaritzak oraindik ez dauka datarik aurreikusita lanak hasteko eta Garraio sailetik aitortu dute exekuzio epeak ez direla betetzen ari. Lanak lehenbailehen hasteko neurriak hartzeko eskatu nahi diogu Jaurlaritzari".
PSE-EE: tranbia, beharrezkoa
Rodriguezen hitzetan, "Debagoieneko komunikazio beharrak nabariak dira, trafikoa jasangaitza delako. Ibarreko errepideetan maiz sortzen dira auto ilarak. Hori gutxi balitz, kutsadura eta aparkaleku premiaren arazoak begibistan daude. Tranbiaren lanak lehenbailehen hastea komeni da, Debagoienean dauzkagun arazoei irtenbideak topatzen hasteko".
Gereñuk gogoratu duenez, tranbiaren proiektuak ez du etenik izan eta lanean dihardute 2000. urtean abian jarritako egitasmoarekin. Herri barruetatik doazen tramuetan izan ezik, bestelakoetan lanean dabiltzala esan du Garraio sailburuak: "Edozein modutan, merezi du lehenbizi udalekin trazaketa adostea, hurrengo mendean tranbiak hor jarraituko du-eta".